TAROMBO DAN SILSILAH MULAI SIAN OMPU TUAN SITUMORANG SAHAT TU NININA SI 7 AMA

Ompu Tuan Situmorang anakna 2 ima namargoar :

1. Panopa Raja/ Br. Limbong
2. Jambulan Mangalele/ Br. Sagala ima na di jou Op. Tumohang
Anakni Panopa Raja 2 namargoar :

1. Op. Ni Ambolas/ Br. Limbong
2. Op. Parhujobung/ Br. Malau
Anakni Op. Ni Ambolas 2 do ima namargoar :

1. Raja Pande/ Br. Sagala
2. Raja Nahor/ Br. Tamba
Anakni Op. Parhujobung 2 do ima :

1. Tuan Suhut/ Br. Pohan
2. Tuan Ringo/ Br. Simangunsong & Br. Sitompul
Ia anakni Jambulan Mangalele 1 do ima :

1. Raja Babiat/ Br. sagala ima na di jou Op. Pangaribuan
Jala anakni Raja Babiat on adong do 3 ima namargoar :

1. Dari Mangambat/ Br. Sagala ima na di jou Sitohang Uruk
2. Raja Itubungna/ Br. Sagala ima na di jou Sitohang Tongatonga
3. Raja Bona ni Onan/ Br. Sagala ima na di jou Sitohang Toruan

Di tingki i mangolu dope ianggo Op. Tuan Situmorang, alai ianggo anakna dohot pahoppuna nunga parjolo monding. Umbahaen i mamereng ninina na 7 ima :

1. Raja Pande
2. Raja Nahor
3. Tuan Suhut
4. Tuan Ringo
5. Dari Mangambat (Sitohang Uruk)
6. Raja Itubungna (Sitohang Tongatonga)
7. Raja Bona ni Onan (Sitohang Toruan)
Sotung marserak haduan jala ndang adong parsadaan ni nasida umbaheni di bahen opputtai Op. Tuan Situmorang ma padan.

Botima isini padani :
“Marhite Padan dohot Tona ni Ompu Tuan Situmorang di Huta Urat na jolo na mandok : Marsada ma hamu, jou hamu ma ahu Amang muna jala hujou ma hamu anakku jala goaronku ma hamu SITUMORANG SIPITU SADA AMA.

Asa si sada lulu anak ma hamu na pitu jala si sada lulu boru.

Anak dohot boru muna na pitu na so jadi masiolian, jala boru muna na so jadi masitindian.
Dengke ni Sabulan tu tonggina tu tabona, manang ise si ose padan tu ripurna tu magona.

Songon tanda ni parpadanan i huhut na gabe parningotan ni angka pinomparna, disuan Ompu Tuan Situmorang do jabi-jabi jala digoari : Jabi-jabi sisangapon di angka na marningot tona dohot padan, jala jabi-jabi si his tu na marningot tona dohot padan. Boti ma jolo tarombo taringot Ompu Tuan Situmorang, molo na hurang lobi di pangkataionku manjalo maaf ahu tu hamu. Mauliate jala Horas ma angka parsadan ni Ompu Tuan Situmorang na adong di portibi on.

NB: Molo adong na lobi hurang rap marsipatikkosan ma hita disi.

Mauliate. Horas